टाउको सोझ्याउने शल्यक्रिया गरेको ८ महिनामै बालकको मृत्यु

भारतका १३ वर्षीय बालकको जीवन बदलिदिने शल्यक्रिया गरेको ८ महिना नबित्दै मृत्यु भएको छ । ती बालकको १८० डिग्रिमा झुण्डिरहने टाउकोको शल्यक्रिया भएको थियो ।

कन्जेनिटल मियोप्याथी नामक निकै दुर्लभ रोग लागेका महेन्द्र अहिरवारको घाँटीको मांशपेशीहरु निकै कमजोर भएकाले उनको टाउकोलाई थेग्न सक्दैनथ्यो जसका कारण उनको टाउको सधैं झुण्डिरहेको हुन्थ्यो ।

मृत्यु हुने दिनको बिहानसम्म उनको अवस्था सामान्य रहेको उनकी आमाले जानकारी दिइन् ।

उनकी आमा सुमित्रा, ३६, ले गत शनिबार उनी बिहानको खाना खाएपछि टिभी हेर्न ओछ्यानमा पल्टिएका थिए । यत्तिकैमा उनको दिउँसो ३ बजे मृत्यु भयो ।

उनको शल्यक्रिया गर्ने डा राजागोपालन कृष्णान उनको अचानक मृत्यु भएको सुनेपछि चकित परेका छन् । उनको छातीको मांसपेशी निकै कमजोर भएकाले उनको मृत्यु भएको हुनसक्ने आशंका व्यक्त गरे ।



डा. कृष्णानले भने, ‘शल्यक्रियापश्चात् जब उनको टाउको झुण्डिन छोड्यो, तब मैले उनको अनुहारमा जुन मस्कान देखेको थिएँ त्यसले मलाई निकै प्रफुल्लित बनाएको थियो । ’

‘मलाई विश्वास छ उनको मृत्युले उनलाई माया गर्ने र उपचारमा संलग्न सबैलाई मर्माहित बनाउने छ । शल्यक्रिया पछि उनको अनुहारमा छाएको मुस्कान सूर्यभन्दा तेजिलो थियो,’ उनले भने ।

उनकी आमा सुमित्राले छोराको अन्तिम अवस्थाबारे वर्णन गरेकी छिन् । उनले भनिन्, ‘उनले बिहान निकै बेर खेले, ब्रेकफास्ट खाएपछि नुहाए र आफ्नो ह्विलचेयरको सहायताले घरभरी कुदे । खाना खाएपछि उनले आफू टिभी हेर्ने बताए । मैले उनको लागि कार्टुन लगाइदिएँ र उनले दुईपटक खोके ।

‘त्यसपछि उनले मलाई उनको छातीमा मालिस गरिदिन आग्रह गरे । उनले तेस्रो पटक खोक्ने प्रयास गरे तर सकेनन् । लगत्तै उनको मृत्यु भयो । छोरा चलेको छैन भनी म चिच्याएँ । मेरा छिमेकीले डाक्टरलाई बोलाएछन् । १५ मिनेटपछि आएको डाक्टरले उनलाई मृत घोषणा गरिदिए । म भुइँमा लडे र उनलाई बस्सरी अँगालो हालें । मैले उनलाई छोड्न सकिरहेको थिइनँ ।’