मकालु एयरको जहाज सिमिकोट विमानस्थलमा दुर्घटना

काठमाडौंः मकालु एयरको जहाज शुक्रबार बिहान हुम्लाको सिमिकोट विमानस्थलमा दुर्घटनामा परेको छ । जहाज अवतरण गर्ने क्रममा जहाजको टायर पम्चर भएर दुर्घटनामा परेको हो ।

सुर्खेतबाट सामान लिएर हुम्ला गएको ९एन एजेजी कल साइनको जहाज सिमकोट विमानस्थलमा अवतरणको क्रममा शुक्रबार बिहान पौने ८ बजे दुर्घटनामा परेको हो ।

अवतरणका क्रममा दाहिने टायर पन्चर हुँदा भएको दुर्घटनाबाट जहाजमा सामान्य क्षति पुगेको छ ।

जहाजमा क्षति पुगे पनि मानवीय क्षति भने नभएको विमानस्थल कार्यालयले जनाएको छ ।

सिमिकोट विमानस्थलका सुरक्षा अधिकारीका अनुसार कार्गो जहाजमा चालक र सहचालक मात्रै थिए ।

जहाजमा सामान्य क्षति पुगे पनि चालकदलका दुवैजना सकुशल रहेका छन् ।